Latviski
Search

Sitemap
Current events - General
14.10.2010
Raiņs, Kūkuojs i kuozys …Andrejdīnā

               Rudiņs – kuozu laiks, kas šūgod nuok ar vairuoku Latgolys kulturis viesturei svareigu nūtykumu i personeibu atceri.

               Kod tautys kulturis viesture jau kaidu laiku raksteita, tod redzīs, ka kotrs gods var byut par nūzeimeigu jubileju škārspunktu, bet ir taidi nūtykumi, personeibys i, golvonais, mīti, nūstuosti, kū jī ap sevi radejuši, ka tys izavierš par jaunu puordzeivuojumu i nūtykumu virpuli.

               Tai i itys gods ir zeimeigs ar tū, ka pīmyn 145. Raiņa jubileju, juo apceriejuma pyrmpubliciejuma „Daugovpils apriņķa Višķu pogosta kuozu īrašys” 120. gadadīnu i Ontonam Kūkuojam byutu 70. Pyrmajā breisneņā redzīs, kas kūpeigs itim nūtykumim? Dzimšonys vīta – Latgola? Ari, bet pats svareiguokais, ka gon Raiņs 19. godu symta ūtrajā pusē, gon O. Kūkuojs, kai izaruoda tuos pošys Raiņa apceris rūsynuots, īinteresejās par vīnu nu bogotuokajom latgalīšu tradicejom – latgalīšu kuozys. Raiņs izveidoj pyrmū plašuokū etnografiskū apceri, bet O. Kūkuojs kūpā ar Rēzeknis Tautys teatri izdūmoj tū paruodeit vysai Latvejai, tai īkustynojūt folklorys kusteibys sasalumu, kas iz kaidu šaļti padūmu godūs beja īsastuojs.

                Tai taps projekts „Rainis, Kūkojs un kāzas Latgalē”, kū atbaļstejs Vaļsts Kulturkapitala fonds i kam rodušīs finansiali atbaļsteituoji ari Latgolā: Aizkalnis tautys noms, VA Memorialūs muzeju apvīneiba, Rēzeknis nūvoda pašvaļdeiba, Nautrānu pogosts, Rēzeknis piļsātys kulturys noms, Rēzeknis Augsškola. I golvonī kuozu vaininīki – Rogovkys etnogrāfiskais ansambļs i dramatyskuo kūpa, deju kūpa „Dziga” i „Dzigis muzykanti”, kai ari sevkurs nu Jiusu, kas īlyugts dzīsmu i rūtaļu saspēlē „Kuozys Latgolā” 30. novembrī Rēzeknis piļsātys kulturys nomā tradicionaluo Andrejdīnys pasuokuma ītvorūs.

                Pyrmuos kuozys jau nūtykušys Jasmuižā, tok uz nuokušajim aicynuoti ari bejušī kuozu gosti, byus izmainis, bet pats svareiguokais – papyldīspiejis sevkuram, kurs jems daleibu. Tradicionaluo Andrejdīna atīs natik viņ ar dzeju, bet ar eistom latgalīši kuozom. Pi kuozu golda paradzāts tostu konkurss, ka esi tūs zynuotuojs, pīsadol! Ka nikod naesi teics kuozu tostu, Tu vari vēļ tū sagatavēt. Tiks nūvārtāts kai eisuokais, tai truopeiguokais, kai babenis pyurā atrosts, tai pašsacarāts tosts. Kai jau parosti, ryupēsimēs par bolvom i radūšu goru!

                                                                                                                                Ilga Šuplinska,

                                                                                                                                idejis autore




For applicants

Contacts
Rezekne, Atbrivosanas aleja 90
LV-4600

Phone: +371 64623709
Fax: +371 64625901
e-mail: ru@ru.lv

 

Top of page

© Rēzeknes Augstskola
All questions and suggestions
send to web@ru.lv