English
Meklēšana

Web-lapas karte
Aktualitātes - Vispārīgās
20.12.2010
Pasuokums „Aulejis sīvom 70”

Pasuokums „Aulejis sīvom 70”

2010. gada 18.decembrī Kruoslovys nūvoda Aulejis pogosta kuļturys nomā nūtyka pasuokums, kurā  atzeimēja etnografiskuo anasambļa „Aulejis sīvys” pastuoviešonys 70 godu jubileju. Itamā šaļtī ansambļa sastuovā ītylpst sešys daleibneicys, vadeituoja Sandra Vaišle. Sīvys turpyna nūvodā īdybynuotuos tradicejis i ar sovom dzīsmem īprīcynoj naviņ vītejūs klauseituoju sirds, bet i vysys Latvejys. Šūreiz ir pīnuocs breids pasateikt par tū.

Iz Auleju beja sabraukuši kaimiņu ansambļu kolektivi, kab vālātu vēļ ilgus godus kūpā byušonu i naizseikstūšu dvēselis spāku. Aulejys sīvys ar zīdim i dzīsmem sveice Kruoslovys nūvoda folklorys kūpys „Rudzutaka”, „Izvoltīši”, „Rauduvīte” i Kombuļu sīvu ansambļs.

Ar eipašim sveicīnim nu Rēzeknis Augstškolys (RA) uzastuoja deju kūpa „Dziga”, kas izdancynuoja ari pošys gaviļneicys jautrajā Aulejis žeperā. Tai kai 2010. goda junī RA studenti kūpā ar pasnīdziejim beja folklorys ekspedicejā tīši Aulejā, tod pasuokuma gaitā tyka prezentāts DVD formata materials „Aulejis anekdoti”. Diska saturs ir saisteits ar Aulejis vizītkarti, kas ir gona atškireiga Latgolys koņtekstā. Vysu pyrms jau par pošom pasuokuma vainineicom, tod Aulejis kļockom i vorčikim, a tod i par anekdošu pamatkonceptim ar Aulejis pīvadumim.

Tai kai dzigenīši i RA docātuoji īsaroda kai čyguoni, tod tyka pīduovuotys ari atbylstūšys nūdarbis – rūtalis i zeileišona, tik eipašā veidā. Skateituojim vajadzēja paruodeit sovu Aulejis sīvu zynuošonys prasmi, nūsaklausūt zīdu horoskopa raksturuojumu i pasokūt, kurei nu sīvom tei varātu byut.

Aulejis sīvu darbeibai svareigs ir pogosta atbolsts. Aulejis pogosta puorvaldnīks Aivars Umbraško sūlejuos sīvom jaunis snuotinis saguoduot, kas ir lobuokuo duovona kūpys aktivuokys koncertiešonys atjaunuošonai. Kai smejīs, pādejuos jaunuos snuotinis Aulejis sīvys šyvušys pyrma braucīņa iz Moskovu, tuolajā 1985. godā.

Naiztyka ari bez slavanojom aulejīšu apsadzīduošonys dzīsmem, tik jubilejis reizē tuos taidys maiguokys beja, ari bez kupli kluota golda ar vysom kļockom i kūpeigys dzīduošonys.

Bet Aulejys sīvom nūvālom:

Dūd, Dīveņi, aulejītem,

Simtu godu nūdzeivuot.

Lai zeļ, plaukst(i) volūdeņa

Kotrā Auļej’s maleņā.

Ieva Vērse, Līga Čevere,

RA 3. kursa filologis






RA Kontaktinformācija
Rēzekne, Atbrīvošanas aleja 90
LV-4601

Tālrunis: +371 64623709
Fakss: +371 64625901

 

Uz lapas sākumu

© Rēzeknes Augstskola
Visus jautājumus un ierosinājumus
sūtiet uz web@ru.lv