English
Meklēšana

Web-lapas karte
Aktualitātes - Vispārīgās
06.12.2011
Gola punkts – pītura „Andreji!”

Gola punkts – pītura „Andreji!”

30. novembrī sevkurs interesents kūpā ar divom stjuartem pīsadaleja i izbaudeja fantazeju ceļojumu da pīturai „Andreji”. Pasuokuma gaitā apsastuojamēs trejuos pīturuos: „Dzejis lasejumi”, „Literarais kabare” i pādiejuo pītura beja „Pyrma syltī”.

Prūtams, lai pīturā pasažiri naaizmygtu, tyka reikuoti vairuoki konkursi, muzykāluos pīturys. Pasuokuma nūzeimeiguokais konkurss beja Andrejdīnys bolva – Uoksta capure, par kuru varāja pasaceiņēt jaunī dzejnīki i prozaiki. Par Uoksta capurys īgyvieji kļyva Rēzeknis Augstškolys studente Māreite Krasnobaja. Pīturā „Pyrma syltī” vareja īpazeitīs ar Raibuo Suņa prozys gruomotu „Pyrma syltī”.

***

Puors vaicuojumu debijis gruomotys autoram Raibajam Suņam.

Parkū Tu izavielieji gruomotai nūsaukumu „Pyrma syltī”?

– Deļkuo?!... gryuši izreizis pasceit. Nūsaukums atguo pats par sevi. Nu bierneibys buļbu tolkom, kod buļbys nalasē cylvāki treis, bet divdesmit. Kur piečuok pi golda tyka āsts, dzarts, cīši dzīduots. I, nadūd Dīvs, ka nu suokuma pyrma suoki gruobuotīs ap solotim! Myusu dīnuos ar tū syltumu tož svareigi. Pozitivu emoceju, dūmu i sajiutu myusim tryukst nu laika gola, a dorbā sādādamam vīna nu dorba dīnys prīcom taišni ir syltys pušdinis, kur itū šaļti gaidi jau nu poša reita.

Kū Tev nūzeimej raksteit?

– Interesants vaicuojums. Cyti sovys sajustuos vibracejis pauž dzīsmēs, dzejā, gleznuos, es –izrokstūt. Interesanti runuotīs ar papeiru, i ja vēļ tovs raksteitīs „garšoj” cytim, tys ir kai stimuls tuoluokuom vibracejom.

Kū Tev nūzeimej Andrejdīna?

– Pyrmkuort, maņ ir pazeistami puors Andri. Ūtrkuort, tys saistuos ar RA reikuotajuom „Andrejdīnom”, kur sasalosa interesanti cylvāki. Kas saisteits ar ritualim – to nikai.

Kas Tev roda īdvasmu prozys rakstiešonai?

– Īdvasmu.... es nazynu. Dažreiz vīnkuorši atīt taidys strēčeitis, kod gribīs paraksteit. Puorsvorā jau cīš tuoļi nav juomeklej. Vyss genialīs ir tepat – myusu dīnu sabīdreibā i cylvākūs, poša sajiutuos. Cylvāks pats par sevi ir interesants dzeivnīks.

Kaidi ir Tovi plani iz turpmuokū laiku saisteibā ar literarū jaunradi?

– Pagaidam nikuo konkreta. Varbyut īsuokt romanu. Vajadzātu kū uzraksteit bārnim. Varbyut pīsavērst cytim projektim. Zyni, tys vyss prosa laiku, kurš palīk duorguoks par gaisu.

***

Daži vaicuojumi Andrejdīnys bolvys īgyviejai Māreitei Krasnobajai.

Kū Tev nūzeimej Andrejdīna?

– Andrejdīna ir eipaši svātki. Itamā dīnā ir vuorda dīna gan maņ cīši lobam draugam, gan onkuļam i, prūtams, ka vysim cytim Andrejim. RA Andrejdīna ari ir eipaša dīna, lai paruodeitu sevi cytim, kas tu esi i ka tu esi. I taidu (rakstūšūs) ir daudz!

Kuru godu Tu pīsadolīs literarajā kabare?

– Pīsadolūs ūtrū godu.

Kas ir Tovys dzejis „suoļs”, „atslāga”?

– Es pīsavieršu cylvākim – tīm, kas šū pasauli izmaina gan uorieji, gan īkšieji. Dzeivis paradoksi i jāga. Cylvāki kūpumā i jūs attīksme pret cytim cylvākim.

***

Kūpumā gon pasuokums, gon ekspresinterveja ar šim divim cylvākim lyka maņ aizadūmuot par dzeivi, par tū, cik ir svareigi atteistēt sovys spiejis i, prūtams, juos paruodēt cytim. Pateikami, ka jau treispadsmytū godu piec kuortys nūrysynojās Andrejdīnis pasuokums, kurs cylvākim atguodynoj par latgalīšu tradicejom i īpazeistynoj ar pazeistamim i pavysam jaunim dzejnīkim i muzykantym.

Ilona Kablanova, 3HFB






RA Kontaktinformācija
Rēzekne, Atbrīvošanas aleja 90
LV-4601

Tālrunis: +371 64623709
Fakss: +371 64625901

 

Uz lapas sākumu

© Rēzeknes Augstskola
Visus jautājumus un ierosinājumus
sūtiet uz web@ru.lv